Ai! laurië lantar lassi súrinen
yéni únótime ve rámar aldaron!
Yéni ve linte yuldar avánier
mi oromardi lissemiruvóreva
Andúne pella Vardo tellumar
nu luini yassen tintilar i eleni
ómaryo airitárilírinen

Sí man i yulma nin enquantuva?

An sí Tintalle Varda Oiolossëo
ve fanyar máryat Elentári ortane
ar ilye tier unduláve lumbule
ar sindanóriello caita mornie
i falmalinnar imbe met
ar hísie untúpa Calaciryo míri oiale

sí vanwa ná Rómello vanwa Valimar!

Namárië! Nai hiruvalye Valimar!
Nai elye hiruva! Namárië